Слово о Животворящем Кресте Господнем,

писанное святейшим Патриархом Никоном

 

Восхотехом же, возлюбленная во Святем Дусе чада, Господа нашего Иисуса Христа любящая и к Честному Его и Животворящему Кресту прилежную веру имущяя, любви вашей предъявити зде и древняя Божественнаго и Честнаго и Животворящаго Креста действия.
Кто бо та подробно, ради неисчисления, изобразити писмены может? Наказующе вас, яко чад наших любезных, присно та Божественнаго Креста действия во уме имети, и сими в любовь распеншагося на нем Иисуса Христа, Господа нашего истиннаго, день и нощь восходити, и к Честному Его и Животворящему Кресту прилежнейшу и неоскудну веру имети.

Святейший Патриарх Никон

Ибо великий Моисей, Божиим манием древле прообразуя и предписуя того Животворящаго Креста, жезлом Чермное море пресече, и толикое множество немокренно и нескорбно проведе, и тогожде Честнаго Креста прознаменованием Меррския воды услади, и от сухаго камени воду преславно источи, и жаждущий народ напои и насыти. К сим же чудесем той же великий Моисей Египта жезлом мучи, и воду в кровь преложи, и гордаго фараона со всем воинством пучиною покры, и многая и великая чудеса содея.
Аще ли же жезл, образ токмо и сень креста начертая, древле таковым и толиким чудесем бысть делатель; что убо есть, еже не имать содеяти и сотвори-ти сей самый Честный Божественный и Животворящий Крест, самовидением видим и нами покланяем и почитаем.
Той бо Честный Крест мысленнаго фараона - диавола многим ранам предаст, видимых и невидимых врагов наших полчища погубит и потопит, движущихся на нас и борющих и смущающих нас страстей море немокренно и без напасти мимо идти нам устроит, устремляю-щияся на ны волны и бури утишит, и мир сотворит, и житие наше сие безмятежно нам прейти сподобит.
Той Животворящий Крест горесть и болезнь напастей и бед наших и частые находы и скорби и искушения, случающиеся нам от мысленных и чувственных враг, на благость преложит и духовное услаждение, и умилит и утешит души наша, падающая унынием и скорбию.
Той Святый и Животворящий Крест воду радости источит нам от Камене, Христа, истиннаго Бога нашего, и пламень искушения погасит, и паче меда и сота усладит и утешит души наша и телеса, и жажду нашу уставит, яко к тому не жаждати: пияй бо от Него, не имать возжаждати во веки, но и реки потекут от чрева его воды живы, яко же рече Самая Истина, Христос Бог наш.
Той Святый Животворящий Крест непобедимое оружие всем Христианом, Церквам красота, Царем победа, упование верным, свет концем, утверждение веры, великое сохранение и похвала Христианом. Сего видяще противныя силы, потаяющеся отыдут; сей бо вселенную всю освяти, и свет наведе, лесть упраздни, языки совокупил есть от востока и запада и севера и юга во едину Церковь, и во едину веру, и во едино крещение, и в любовь вся связал есть; непобедимый град Христианом, победное оружие Великаго Царя Христа: сей есть водружен на месте Лобнем, и абие прозябе грозд жизни нашея.
Сим драгим оружием Христос Бог наш разверзе всенесытую утробу адову, и неприязни затче уста.
Сего видевше, смерть абие вострепеташа, и вся, яже от перваго Адама име, испусти.
Сим вооружившеся блаженнии Апостоли, всю силу вражию попраша; сим облекшеся во броня место воини Христови, Мученицы, вся помышления и шатания мучителей попраша.
О сем и блаженный Павел возопи и рече: Мне же да не будет хвалитися, токмо о Кресте Господа нашего Иисуса Христа... (Гал. 6, 14)
Крестный бо образ на четыре страны разделяем, от посредняго знамения показует, яко вся Божественным естеством содержима суть: вышняя убо вышним рогом содержима суть, нижняя же нижним, посредняя же двоими странами, сиречь руками. Даже убо покажет Господь Иисус, яко Той есть собираяй и содержали всяческая; сего ради крестную смерть прияти изволи. Се паки блаженный Павел, знаменуя ко Ефесеом, пишет: Да возможете, рече, разумети со всеми святыми, что широта и долгота и глубина и высота... (Еф. 3, 18); знаменуя убо высотою небесная, глубиною же преисподняя, широтою же и долготою посредняя конца, всесильною державою содержима: сей бо образ и Божественный Давид воспел есть, глаголя: Камо пойду от Духа Твоего? И от лица Твоего камо бежу? Аще взыду на небо, се есть высота; аще сниду во ад, се есть глубина; аще возму криле мои рано, еже есть солнечное восхождение, се есть широта; аще вселюся в последних моря (Пс. 138, 7-9), западные страны тако именует, се есть долгота!
Сего ради вся дела наша Божественным Крестом совершаем, и, покпаняющеся вознесшемуся на нем Христу, величаем Его и прославляем. Хваляй бо Крест, Распеншагося на нем почитает и славит и кланяется; Крестом бо мучитель попран бысть, и смерть отбеже, и ад пленен бысть.
Той бо Честный и Животворящий Крест Господень, вселенныя слава и радование, благочестивых Царей непобедимое оружие, безсильных сила, благочестивых людей победа и укрепление, доброчестивых воинов дерзновение, путешественником спутник, обуреваемых победа, бедствуемых избавление, Трижелаемый и Пречестный, плавающих наставление, обуреваемых тишина, монахов сила, мирских хранило, Мучеников похвала, Постников радование, Апостолов проповедание, Пророков пророчество, Учителей помощь, всех Святых святое и честное украшение, хранитель благочестивых Христиан, егоже и сень разоряет, многоковарственныя сети вражия, тому мы, благословеннии Христиане, да поклонимся, того да облобызаем, того вседушно целуем со страхом и радостию: со страхом убо за не достоинство наше, с радостию же за благодать, юже нам дарует.
Но не престаю сладости его наслаждатися: Честным бо Крестом врата райская затворенная паки отверзаются, смерти держава разрушися, ад сокрушися, умерши живота сподобишася, небесная со земными совокупишася, оставление грехов нам даровася, сынове Божия и наследницы Царства Небеснаго нарицатися сподобихомся.
Крестом бо совершаются все таинства веры нашея. Тем венчаемся, тем освящаемся. И который убо язык изглаголати может, елика и какова Крестом дарова Бог роду человеческому? Сей Крест и мы, аще истинно воображаем, и приличною честию восхощем его почтити вещию или осенением десницы на лице нашем, треми первыми персты, соединивше я во образ Святыя Троицы, зане тако вси Православнии Восточныя Церкве сынове имут древний обычай по преданию покланятися, имуще три первые персты, совокупленны вкупе во образ Святыя Троицы, Ея же просвещением открыся нам таинство воплощеннаго Смотрения, и научихомся славити единаго Бога в трех ипостасех, Отца и Сына и Святаго Духа, и распинатися вкупе со Крестом Господа нашего Иисуса Христа, Сына Божия, с небес сошедшаго, и вочеловечшагося, и плотию пострадавшаго нашего ради спасения. Являет же ся благословно, зане совокуплением трех перстов во уме имеет таинство Святыя Троицы, и внегда изобразуем на себе Крест Господень, воспоминаем страдание и воскресение Его, имиже и их ради призываем от Бога Вседержителя помощь, хотящаго всем спастися.
Его же Божественная благодать и Промысл яви Константину, первому Христианскому Царю, молящуся на мучителя Максентия, образ Честнаго и Животворящаго Креста на небеси воображен звездами, сияющ паче солнца, к семуже и глас, с небеси глаголяй сице: «Константине! сим побеждай враги». Нощию же, спящу ему, явися Христос, и паки показа ему явльшееся на небеси знамение Честнаго Креста, и повеле ему сотворити подобие его, и носити сие пред полками, и не токмо, рече, Максентия победиши, но и все враги твоя.
Востав же, Царь Константин проповеда всем боляром видение свое, и призва хитрые златари, повеле им сотворити Честный Крест во образ явльшагося ему знамения златом и бисером и камением драгим, и повеле той Честный Крест носити пред полками вой своих, и силою распеншагося на Кресте Иисуса Христа, истиннаго Бога нашего, три достопамятныя победы постави: первую на мучителя Максентия, вторую, егда Византию взя, третью, егда на Дунайстей реце Скифы победи. И по образу оных трех славных побед, устроив те чистыя меди Честные три Кресты, и нарече святые их имена сице: ИИСУС ХРИСТОС НИКА. Ника убо есть Греческое речение, Славенски же толкуется: побеждает, яко рещи вкупе словенски: Иисус Христос побеждает, сиречь победу поставляет на всякое сопротивляющееся Ему деяние.
В воспоминание же оныя тричисленныя Честнаго Креста победы великий Царь Константин возгради в своей державе монастырь во имя давшаго ему на враги победу Честнаго и Животворящаго Креста Господня, и именова его Ставрос, еже есть Крест, иже и доныне во святей Афонстей Горе силою Распятаго стоит неврежден.
От оных же убо триех Честных Крестов, их же великий Царь Константин сотвори, един принесен есть в Россию при Великом Князе Владимире, иже есть и доныне в царствующем великом граде Москве, его же Божественною и Пресвятою силою той царствующий преименитый град Москва, со всеми прилежащими к нему странами, блюдом есть и покрываем.
Его же животворящим и всесильным действием прежде бывший православнии Велиции Князи и Цари Российстии светлое одоление и победы над враги своими поставляху, и окрестныя иноверныя страны под Богохра-нимую Российскаго Царствия державу удобь покоряху.
Такожде убо и благочестивый Христолюбивый великий Государь наш Царь и Великий Князь Алексий Михайлович всея Вели-кия и Малыя и Белыя России Самодержец и многих государств Государь и Обладатель, исполняя Господа нашего Иисуса Христа бывшее к великому Царю Константину в видении о Честном Кресте, еже носити его над полками на победу врагов, повеление, и во всем оному первому Христианскому Царю ревнуяй, оный един от триех Честный Животворящий Крест Господень благочестиваго своего воинства пред полками носити повеле, и силою распеншагося на Кресте Иисуса Христа, истиннаго Бога нашего, врагов его побеждает, якоже и всеми видимо есть.
Веруем же в Господа нашего Иисуса Христа, яко Той, силою того Честнаго и Животворящаго Креста, его царскому Величеству подаст на всех врагов его и сопостатов совершенную победу и одоление, и возвысит державу царствия его, и миром оградит, и исполнит всякия благодати, яже к житию человеческому потребно, и дарует под державою его сущим вся благая и радостная.
Паки же во Второе пришествие великаго Бога и Спаса нашего Иисуса Христа Божественный Его Животворящий Крест, на Нем же нашего ради спасения изволи распятися, пред самым тем праведным Судиею Иисусом Христом, истинным Богом нашим, грядущим воздати комуждо по делом, первое явитися имать на небеси со славою небесною и со многими полки Ангельскими, отвращающихся убо от него врагов страша и оскорбляя, почитающих же его верных веселя и просвещая, и пришествие являя великаго Царя Иисуса Христа, истиннаго Бога нашего.
Емуже подобает всякая слава, честь и поклонение, пение же и благодарение со безначальным Его единосущным Отцем и со Пресвятым, Благим и Животворящим Утешителем Духом, ныне и присно и в неcкончаемые веки веков. Аминь.